(( بعد السفر ))***** بقلمى / عصام مدين

***(( بعد السفر ))*****
بقلمى / عصام مدين
*********************
باعشق قدومك ياحبيبتى م السفر
وانتى فى سمايا بتظهرى
وتنورى بيتى الحجر
قلبى اللى عايش منتظر
يضم سحرك يلمسك
وتلمى فيه اللى انكسر
حبك أمر حبك أمر
وانا قلبى مستشعر خطر
لما بيبعد عن عنيكى فى ليلة باردة
بتشتكى بعد المطر
باصبح حجر
باصبح ورق ناشف حزين
قطعوه بقسوة من الشجر
باصبح رماد وتاريخ قديم
مالهوش معالم أو أثر
باصبح وريد شريان بينزف
بابقى ضحكة بتحتضر
بابقى فى بعادك طير عليل
وجناحه واهى ومنكسر
باصبح حبيبتى شطوط غرق
باصبح ورق من غير عبر
باصبح مدينة ماليها خوف
ورياح ضجر
باصبح خسوف وكسوف ونوح
ودموع بشر
وانتى القمر
هليتى بعد الرحلة
نورك ضمنى زى الوتر
وبقيت باغنى للشفايف والعيون
قلبى انتصر
بقى ليه حبيبه تهدهده
وتدوقه طعم الهنا بعد السفر
قلبى بيلمس خطوتك ومحبتك
كل المعانى والصور
ياحبيبتى من سفرك بكيت
ومشيت أدور فى الشوارع وانتظر
لحظة قدومك بالأغاني والأمانى
والمعانى من السفر
وأديكى جيتى ملونه قلبك بحبى
ودنيتك شوقه وسهر
ياحبيبتى من بعد السفر هاكتب
حروفى تونسك ويا السحر
وأكتب قصايد فى العنين الطيبين
ويا الايدين المليانين عطر و حنين
وارسم عيونك ع البيبان ورد وشجر
هاكتب ديوان فى العشق انتى قصته
واكتب كمان انك بشايره وضحكته
وانك أميرة فوق عروشى وبأعتذر
كل القصايد مش حتقدر توصــفك
وكمان حروفى مهما كانت تعرفك
حايرة فى هواكى ونور عنيكى المنهمر
سامحينى ياحبيبتى أنا عاشق وشاعر إنما
حبك كبير ميكفيهوش حرف البشر
*********************
بقلمى / عصام مدين