بقلمي / عصام مدين
...............................
وعمرك شُفت في العاشقين حبيب ندمان ؟؟
بيندم إنه بيضيَع هناه بإيديه ؟
بيتكلم ساعات بالعقل وهو الحب يا خيبان
بيعرف عقل أو يراعيه ؟
مشاعر عشقنا تجنن فليه نكتمها نخنقها ؟
وليه بالعقل نضنيها و نشنقها ؟
من المفروض نكون طايرين ونسبقها
وهي تبقي تلحقنا حذاري إنت تلحقها
ويبقى الحب مبدأنا كما العنوان
جنون الحب بيلون قلوب عاشقة
في سكة ضحكة مجنونة لكين رايقة
وإيد دافية بتحضن إيد من الفرقة
وقلب صراخه بيدوي من الحُرقة
وشوق جارف ونظرة رسمها الرقة
أنا العاشق الأغبى بين العاشقين
غبائي يفوق غباء الكل
حَكَمت في لحظة على قلبي يموت ويضل
حرمت فؤادي من ضمة بتشفي الذل
حبستُه في سجن لضلوعي عشان مختل
وهو القلب ايه وصفُه لو يعقل ويصبح عقل ؟؟
حيبقي الجسم فيه عقلين يموت القلب ويسافر
حترحل جنة الدنيا وتتاخر على الأخر
ونصبح كالجماد عايشين كصخرة من حديد زاجر
وهو الشاطر المجدع يكون مجنون على الأخر
أنا إستغبيت فـَ خَوِفت الأميرة تخُش أحضاني
وخليتها تخاف توصل وتلمس فيا شرياني
وسَحَبِت إيدها من إيدي بقيت مسجوني سجاني
عيونها بالمرار فاضت ونسيِت بيتي عنواني
أنا العاشق الأغبى في تاريخ الحب سامعاني ؟
أنا اللي علمتك زمان تتجنني معايا
وليه دلوقتي عقلتِك فسبتيني لأحزاني
ما كنا في الوجود هايمين فـَ ليه العقل يهواني
وليه قلبك وليه قلبي يموتوا وسط أشجانك و أشجاني
وحرمانك وحرماني
سماح للعاشق التايه أنا أستاهل أعيش الحزن يغواني
......................................
بقلمي / عصام مدين
الأحد 31 / 12 / 2017 م
بين جدران غرفتي الحزينة البلهاء
ليست هناك تعليقات:
إرسال تعليق