كل نسمة ،،،الشاعر عادل ابو زيد

كل نسمه
كل نسمه جايه من عندك
باخدها ف حضني
واسألها عليك
كل من شافك
بابُص ف عينه
يمكن أشوف عنيك
ويسألوني لسه فاكر
ابتسم وأخبي عيني
وأنكرك وأقول ناسيك
...........................
كل نسمة جايه من عندك
بابوسها ألف مرة
والهوى اللي شاف شفايفك
حلّى كل حاجه مره
لمسة ايديك
واحشاني موت
نظرة عنيك
حتى السكوت
بعدين معاك
باحلف لقلبي كدب
ان معادنا بكره
..................
واقول لعيني
غمضي نامي
نفسي اشوفك
لو في احلامي
واحلف لايدي
هاتلمسي ايده
واحلف لعمري
العمر هانعيده

كل نسمه جايه من عندك
سفينة ذكريات
بافرد قلوعها
وأقول للشط
يبعد من سكات
أجمل ساعات العمر
كانت في السفينه
بازعل قوي لوقالوا
راح ترسى ف مينا
خلينا ماشيين
يا سفينة الذكريات
خلينا عايشين
ف اللي فات
سيب الشراع الوردي
ده يرفرف علينا
نسمة هوا
جايبة الدوا
خليها تشفينا
عادل أبو زيد